Ki moun ki ape dirije peyi an fen?

3 Mwa depi sosyete ayisyen an ape konnen yon move moman akoz diskisyon chire pit ki egziste nan mitan dirijan peyi yo. Anpil pwopozisyon chita pale, kòlè, boude, fache voye monte tout moun ape opine sou ki lè yo ape fini pa jwenn yon antant. Mesye marthelly pèsonèlman desann nan chanm lan nan lide pou wè si li ta kapab konvenk palmantè yo men san siksè. Yo kanpe sou desizyon yo Gousse pa ratifye.

      Brit sou kou ansyen mèt monn lan desann anba, HUMMMMMMMMMMM! Tout moun dakò. Yo te genyen tan santi nesesite pou ayiti avanse. Tout blokay fini. Chèf la pale tout moun se bouch be. Pa sèlman sa. Mesye Clinton tèlman enpòtan nan chanje vi ayisyen yo li bride yon lòt pòs Direktè Konsèy konsiltatif pou devlopman ekonomik ak envestisman. Yon pi gwo pòs. Yon pozisyon nou ta kapab mande ki lès ki Prezidan peyi a. Ou di mwens si pa genyen youn nan 2 moun sa yo ki pi wo grade ke lòt nan mennen bak nasyon ayisyen an.
      Kesyon nou ape poze se: ki lè depite ak senatè ayisyen te renmen ayiti konsa pou yo te genyen tan wè nan Mesye Conille moun ki ape vini chanje sosyete a? Kote negosiyasyon, chita pale, pòs minis finans yo te ape mande a? Kote konstitisyon yo te ape defann nan kesyon majorite palmantè ki dwe pwopoze Pwemye minis lan? Sa pa a la mòd ankò? Mwen ta renmen mande ki lès ki mèt peyi a nan kout kat sa? Sa vo lapenn!!!