18 me ayiti ape fete anba pwoteksyon ak sekirite yon fòs etanje

Mwen panse se ipokrizi si jodi a mwen ta kanpe pou fete fèt drapo anba yon dominasyon fòs etranje sou sòl ayisyen an. 
      18 me make anivèsè yon konba Ewo nou yo te genyen ki te pwale bay endepandans nasyon an. Se yon wonte pou nou pou di nou se yon pèp ki lib pandan menm pouvwa nou pa genyen pou nou deside sou sekirite nou. Sepandan li rete yon eksplwa, yon viktwa, yon fyète menm lè se sèlman nan istwa nou li rete make.

      Respè pou sa yo ki te bay vi yo pou koz sa. Kouray a sila yo ki toujou genyen nan lespri yo li ankò posib pou nou libere tèt nou de esklavay modèn sa. Nou genyen anpil pou nou fè toujou. 18 me yon jou ki ekri nan istwa monn lan ke militan afriken yo chase nan zòn vètyè twoup fransè a kòm lame ki te pi pisan nan epòk la poutan jodi a ankò nou anvayi pa yon fòs miltinasyonal ak menm peyi nou te ede goumen pou soti tèt yo nan esklavay ke yo menm pou kò yo pa te kapab fè. Se petèt pa nesesè pou nou oblije goumen kò a kò pou mete yo deyò men nou genyen pou nou lite si nou vle tout bon di ayiti libere.
      Se fèt ou ayiti, kouman mwen ta kapab fè inyore sa? Mwen pa ta pe janmen lage ou pou kò ou men mwen dwe di mwen santi mwen jennen pou rejwi nan jan yo ape mal mennen ou lan. Mwen pa konnen ki sa mwen dwe fè men mwen santi nesesite pou aji jouk ou rale yon souf. Mwen espere yon jou yon jenerasyon va leve kote moun ki genyen san ayisyen ki koule nan venn yo va pran relèv zansèt nou yo pou goumen pou ou anfen repoze.
      Wi, pou mwen se ipokrizi pou di mwen se yon moun ki lib lè mantalman mwen santi mwen pa nan nivo yon ti kote mwen voye sòlda ayisyen goumen pou bay yo libète jodi a se li menm ki ape vini mete lòd nan sa frè ak sè mwen yo ape fè ou pase. Yon 18 me tankou jodi a va rive kote lè mwen gade tou patou sou ti bout tè sa se sèlman drapo ou la ke Jan Jank Desalin de fè katrin Flon koud la nan dechire pati blan an san espri rasis pou di nou fini ak esklavay lè sa si mwen ankò vivan mwen va leve tèt mwen pou di: "POUR LE DRAPO POUR LA PATRIE" e menm "MOURIR EST BEAU".