Ki prezidan ki kapab chanje ayiti san yon refòm sistematik?

Prensipal motif ki koze tout dekadans sa nan sosyete ayisyen an se rezon dezoryantasyon nan bwat leta yo. Nan yon diskisyon mwen te genyen ak yon gwoup etidyan ki orijinè ayisyen nan yon inivèsite mwen  mande yo ki sa selon yo ki mete peyi a kote li ye la jodi a? Yo reponn: "Manke moun ki kapab dirije li". Mwen di non paske nou genyen ase moun ki pase nan tèt leta men pito yon pwoblèm enstitisyonèl a baz sistematik. Youn nan yo konteste pou di men: enstitisyon yo ki moun ki kreye yo si se pa moun? Ak la verite li genyen rezon paske tout òganizasyon kanpe ak yon kad ki bay li jarèt. Men prensip yo rete etènèl. Se sa ki fè menm si yon kad ale youn ranplase li jesyon yo toujou asire, paske genyen nòm ki reji fonksyonman aparèy sa. Yo kapab varye swivan sitiyasyon ak peryòd yo men pwotokòl yo se sa ki fè fòs ak bay valè ak yon regwoupman. Ki sa ki fè pyès bwat leta pa mache? Rezon an senp. Pwoblèm edikasyon ki chita sou tradisyon. Koripsyon mache tankou yon gaz, lè li tonbe li anvayi epi afekte tout sifas kote li pase. Enfliyaans yon enstititè kapab kite mak li sou moun ki nan antouray li ki fè jodi a nou ape peye sa predesesè yo te fè nan pati kote yo te ape dirije. Men kounye a kouman nou kapab korije sa? Menm repetisyon yo.
1, Koumanse pa travay ak fanmi yo nan aprann paran yo pou kondwyi pitit yo nan chemen ki dwat pou pa pran sa ki pa pou yo.
2, Vote lwa ki kapab pini moun ki patisipe prè ou lwen nan blanchisman fon leta. Sa mande pou genyen bon jij nan aparèy jistis la. Ak yon twazyèm eleman ki se
3, santiman patriyotik ki dwe anvayi nanm tout moun ki plase pou mennen bak peyi a. San yon konsyans nasyonal li difisil e menm enposib pou nou soti nasyon an nan enpas sa li ye jodi a. Donk yon lòt fwa nou bezwen travay ak ti moun yo pou yo renmen nasyon an, pou yo santi yo fyè yo se ayisyen (refòm edikatif)
      Nenpòt gouvennman ki manifeste volonte pou chanje sa ta dwe enperativman monte ak yon ekip sa vle di chanje tout moun sa yo paske yo deja kowonpi, nan nivo yo ye la li se te ape yon lit pou ou detounen yo, donk twòp tan pou pèdi nan 5 an li pape yon jwèt ki piti pou yon moun ki vle fè peyi a vanse. Prepare yon kad depi nan peryòd ou imajine vini jesyone peyi a ki vize menm objektif ak ou. La se yon lòt sijè. Nan yon pwochen edisyon mwen va montre nou pou ki lidè nou yo pa reyisi malgre bon volonte yo genyen pou devlope peyi a.
      Monte nan tèt ayiti pou di mwen ou pwale chanje li san ou pa aplike prensip sa yo mwen kanpe mwen ape gade ou paske tout sa yo fabrike kreye ak yon lwa ki gouvène li. A ou pou di mwen kouman ou ape reyisi.