Ayiti pran nan KA ekspozan 2

Depi apre monte Michel Marthelly nan tèt peyi a genyen yon kriz ki demare ant egzekitif ak lejislatif la. 2 moun nan 2 kouch ak pase diferan deja jwenn baryè yo devan palman an. Danier G. Rousier te sèvi kòm konsil Onorè peyi Jamayik pa jwenn vòt chanm depite a selon sa yo di. Jouk la nou dakò. Si nou ape konstywi yon sosyete nou dwe pare pou fè respekte lwa yo. Menm lè ta genyen yon motif kache dèyè desizyon sa pyès moun pa kapab di anyen. Mwen bèbè. E pou Gousse? Byen ke mwen pa te pataje ide pou nonm sa monte nan tèt gouvènman an akoz komisyon ki te ape dirije an 2004 la pa te kredid nan sa yo te ape antreprann ki donk pa genyen okenn prèv eleman sa te pwale fè yon bagay ki pozitif pou chanje vi ayisyen yo, men rezon echèk li devan palman an bay a panse sou ki wòl ak ki pozisyon palmantè yo jwe nan vi pèp ayisyen an.
      Fwa sa se Mesye Garry Conille.Yon eleman ki ape fè anpil pale sou nominasyon li kòm potansyèl kandida pou chèz vila d'akèy la. Selon atik 157 konstitisyon 1987 la li klè sou ki jan yon moun kapab vini Pwemye Minis. Li presize nan atik 158 devwa li nan chanje vi chak grenn ayisyen. Conille tankou anpil moun ki pase deja genyen yon palmarès ki foul men tou ki kite nou ak anpil dout ki sa moun sa yo anvizaje fè pou pèp ayisyen an. Yon pèsonay ki se reprezantan nou ape oze di li grenn je envizib la fòk ayiti ta refèt ankò pou nominasyon sa ta pote yon bagay pozitif nan chanje povwete pitit ayiti yo.
      Anpils ki moun ki fè pwopozisyon sa?  Sa fè kèk jou depi Bill Cliton desann nan chanm lan nan lide pou jwenn yon antant nan polemik ki egziste depi plis ke 3 mwa. Nou konnen sa mesye sa vle di nan koze konstywiksyon ayiti ak lajan peyi a nan men li. Yon aksyon ki twò vizib pou yon ti moun ki apenn ape rale pa konprann. Prezidan peyi a fòmèlman dezinye Conille kòm dezyèm moun ki pi enpòtan nan klas politik la nan vi nasyonal la. Ki lè Marthelly fè reyalizasyon sa? Yon lavay sèvo? Si yon lòt fwa yo ta dwe elimine pwopozisyon sa pou koz regleman lwa konstitisyon an mwen ape retire Prezidan peyi a kòm yon enkapab paske se pa pwemye fwa yo ape di li li dwe verifye legalite pyès moun li yo anvan li voye yo nan chanm lan. nan kout kat sa ki bò ayiti ape benefisye yon chanyman ?
      Nou pape sispann repete fòk ayiti chanje men nan faz nou ye la nou doute moun ki ape mennen bak peyi a genyen klèvwayans sou sa nou genyen bezwen ak ki mwayen ayiti kapab avanse.
      Envizib la fò epi plan li pou nou byen defini. Rèv li apati aksyon li montre ki sa li vle fè ak nou. Si nou pa regwoupe nou kòm moun ki sivilize Ayiti fenk pran nan KA ekspozan 2.