Michel Marthelly sanble tèt koupe ak Sudre P. Dartiguenave.

   Apre okipasyon ameriken an 1915 yo nonmen nan tèt peyi a Phillip  Sudre  Dartiguenave. Anpil zafè enkonstitisyonèl tankou nonmen Direktè jeneral, kraze palman an an 1917 nan lide pou satisfè pasyon fòs etranje a ki te genyen nan tèt li Franklin Delano Roosevelt kòm jeneral. Tout moun ki klèvwayan kapab dedywi avni gouvennman sa nan sa li ape antreprann nan vyole prensip konstitisyonèl yo.
      Ki sa lwa peyi a di sou nonmen Direktè jeneral yo? Li klè ke li dwe fèt an konsètasyon ak Minis yo dapre atik 142 konstitisyon an. Ou kapab vle di mwen pa genyen gouvennman nasyon an pa kapab rete san dirijan men yon bagay pa genyen pou wè ak yon lòt. Si tout bon moun sa yo manifeste volonte pou yo chanje peyi a yo dwe chache jwenn yon antant pou mete fen ak kriz ki enpeche yo aplike pwogram yo e non pyetine konstitisyon peyi a.
      Lòt pwen ki enpòtan se kesyon pòs politik Prezidan an ape envante yo. Nenpòt moun kapab travay ak leta ayisyen nan koperasyon pou ede nou solisyone pwoblèn nou yo. Mwen pa wè sa kòm yon big deal. Okontrè mwen ankouraje lide pou chache plis api teknik, pwofesyonèl ak kad tankou peyi kiba, venezywela, iran ak lachin men kesyon pou nonmen yon etranje nan sen gouvennman an bay a panse. Direktè konsèy konsiltatif pou devlopman ekonomik ak envestisman nouvo pòs ki dezinye Mesye Bill Clinton nan mitan gouvennman an egzije nou mande ki lès ki ape dirije nasyon ayisyen an lè nou konnen koze ekonomi ak envestisman revyen a lidè peyi a pou elve. Ki benefis ayiti ape jywi nan plas sa? Nou nan nesesite se vre men se pa yon rezon pou nou ape tòchonnen lwa ki fè ayiti gran moun tèt li yo. Anplis li pa konstitisyonèl selon atik 12-2 ki pale sou kesyon moun ki pa ayisyen natif natal yo.
      Tout kòd wout marye ak yon bann konsekans. Nan ka ou ou vyole youn ladan yo ou dwe pini selon sa regleman yo prevwa nan ka sa.
      An 1985 peyi Wisi pran nan yon fo lidè Mikhail S. Gorvachyov fabrike pa fòs envizib la ki an 1991 pwale kraze KGB sistèm wisyen an atè plat.
      Yon Ayiti ki granm moun tèt li nan mache anba prensip konstitisyonèl ki defini kouman nou dwe viv nou bezwen. Poutan li lwen pou li aspire nou konfyans ke sosyete ayisyen an ape rale yon souf jan gouvennman sa pwale a.
      Pito nou veye paske plan envizib la ape rapousib pa apre pa san nou pa rann nou kont.