Ki sa ki pwogram Prezidan an nan diskou li a menm?

      Tout vwayajè entelijan ki ape fè yon wout pou pwemye fwa toujou mache ak yon kat jeografik ou byen yon bousòl. Se pa yon mal si ou pa konnen, men se yon peche si ou  pa chache fòme ou.

      Moun ki ape analize diskou Prezidan Marthelly a kapab konprann fristrasyon li pou bagay yo ki pape mache, ak volonte li pou sa chanje. men an nou ale pi lwen. Pa genyen voye wòch kache men. Nou Ayisyen nou admèt 5 dènye ane ki soti pase la yo nou pa kapab konte yo kòm pwogrè nan kalandriye lavi pèp Ayisyen an. Gouvènman ki soti pase a yo rele li gouvènman bèbè paske li pa janmen di anyen. Lè yo te fenk monte nou te panse se te yon estrateji, men rezilta yo bay nou yon lòt tandans de yo. Kit se enkapasite ou byen manke volonte yo pa renmèt anyen. Non plis nou pa kapab mande yo kont, anyen yo pate pwomèt.

      Si nou oze poze tèt nou kesyon (nou konnen Ayiti moun pa genyen dwa a la pawòl) ki sa nou kapab espere de nouvo Prezidan sa? Yon moun pa bezwen se yon gran analis ni politisyen pou rann ou kont ke Mesye Marthelly pa avanse pyès pwogram. Si li genyen youn, li pa anonse li nan envestiti li a. Pèp la tèlman te ape tann plan nouvo chèf leta a ke Ekselans lan fini pale nou pa rann nou kont. Antouka nou pa la pou voye lwil nan dife. Wòl nou se fòme ak enfòme yon popilasyon ki depi plizyè deseni ki zonbifye nan fason lidè politik yo ape menen sosyete Ayisyen an. Ki donk, nou ape rete sou sispenn sou sa ki pwale pase yo, ou byen nou kapab deja wè reflè imay dirijan ki deja pase yo nan sans sa? Menm jeni yo konnen planifye. Nou pa kwè chèf leta peyi pwale konsève yon kalandriye nan memwa li ou byen se yon sipriz li anvi fè nou. Kèlke saw sa li kapab ye, pèp Ayisyen ouvè je nou. Paske si gouvènman sa echwe se nou tout Ayisyen ki echwe kit sa ki te vote kit sa ki pate vote.

      Li pa tan pou pasyon ak voye monte. Olye pou nou ale rele aba nan 2 zan ki pwale vini la yo, an nou idantifye bezwen Ayiti epi egzije otorite leta yo satisfè demann nou yo. Sonje; nou genyen yon nasyon pou nou pwoteje, yon pèp pou nou enstywi, yon peyi pou nou konstywi.