E si Prezidan Marthelly te mouri?

Youn nan gwo pwoblèm ki ape kraze peyi ayiti se kesyon tout bagay parèt piti devan je nou. Se yon ti ensidan, ti aksidan, yon ti pwoblèm, ti konfli, yon ti diskisyon ki poutan toujou fini pa yon sèl bagay san moun ki ape koule. Nou pa janmen kapab wè anplè ak gravite bagay yo lè yo ape pase. Sa fè wont nan yon zòn Prezidan peyi a ale pou lanse yon kanpay touristik, kote etranje pwale vini vizite, pou ki pa vini envesti pou se sa ki pase. Wòch, boutèy selon sa li deklare se te yon tantativ pou fini ak vi li. Ki sa sa ye? Yon chèf leta ki tonbe nan pwòp peyi li anba men bandi. Kouman nou panse blan an ape gade nou? Ki sous polemik sa? Pou ki rezon?

      An nou eyese fè yon ti analiz sou sitiyasyon sa. Nan yon kòmantè mwen te deja fè nan yon fowòm mwen te avanse 3 bagay yon nasyon bezwen pou li avanse. pwemye an se:

KILTI ansywit ou jwenn RESPE an dènye SEKIRITE.

      Pou ou atire envestisè etranje vini etabli baz yo nan peyi ou ou bezwen reyini kondisyon sa yo sinon se reve ou a reve wè devlopman. Imajine Pwemye sitwayen yon peyi pa epanye anba zak briganday, ki moun ki pape viktim? Ki jan ou pwale konvenk moun ki pa menm konnen sosyete a byen pou vini chita ladan? An nou serye mezanmi. Piga nou bay tèt nou manti. La se deja yon echèk pou lansman pwogram touristik gouvènman sa ape pwone a. Si nou vle kwè li nou va kwè.

      Lòt pwen nou dwe mete anpil aksan sou li se: Kote dirijan zòn sa? Majistra, depite, senatè, komisè komin lan? Kote sèvis entelijans peyi a ki la pou ranmase enfòmasyon pou asire tout zòn lan sekirize? Ayiti pa genyen? Si wi mwen jouk mwen ape pale la mwen pa konnen kouman li rele. Si Prezidan an te mouri ki moun yo te ape bay responsab? Yo di yo fè arestasyon, arestasyon ki moun? A ki fen? Yo ape jwenn tèt bagay la? Ki jan nasyon an ape konnen? Deplasman yon chèf leta dwe asire 5 jou anvan li reyalize. Yo dwe asire ke tout bagay kòrèk, tout kouvèti byen fèt anvan yo otorize li soti? Sa ki pase? Se yon fay ou byen yon konplo?

      Relasyon diplomatik ayiti se yon bagay ki frajil. Nou pare pou envite yon otorite nan yon lòt nasyon vini asiste nou? Sa te ape fè lèd pou se sa ki ta pase pandan yon lòt moun la! Nou kapab toujou pa santi ki gravite bagay sa men nou lèd nan je moun ki ape obsève nou. Nou poko kapab wè nesesite pou genyen yon lame nan peyi a. Petèt nou ape tann se yon 1915 ki pou repwodywi pou nou pran konsyans de ki sa nou reprezante nan je monn lan.

      Mwen espere fwa sa zotobre nan leta ayisyen yo ape sezi epi korije erè sa. Yo ta dwe mande nou ekskiz pou sa. Se yon jès imilyan nou poko kapab efase nan souvni moun ki ape panse pou nou yo. Ki garanti ayisyen ki lòt bò yo genyen si yo antre vini ede nasyon an pape viktim menm bagay yo e menm pi rèd? Nou ki va di mwen, istwa ayiti ki ape kontinye ekri nan liv nouvo monn lan.