2 mwa depi nou ape tann yo refè lame a...

Plis ke 2 mwa depi peyi a genyen yon nouvo prezidan nan tèt li. Pwomès lekòl ak rekanpe lame a se pwen fò chèf leta a. Depi monte li a genyen inogirasyon ak reparasyon enstitisyon eskolè ki ape fèt. Se byen. Trè byen.Sa montre genyen yon kontinywite sou sa ki te deja planifye.

      Si ou konnen frekante kèk bank nan peyi a ou kapab li nan tout mi yo afich ki anonse nasyon an genyen yon dediksyon de 1,50 dola ameriken sou tout tranzaksyon lajan ki fèt. Si ankò ou ape viv lòt bò anvan ou fè yon apèl pou rele ayiti operatè elektronik lan anonse ou yo ape takse ou pou sa. Sa se sa Ekselans lan te di. Jouk la nou dakò.

Men yon gwo kesyon nou ta dwe poze : Kouman nou ape fè konnen konbyen kòb leta ayisyen rantre nan fason sa? E si pèp la egzije transparans nan jan lajan yo ape rantre epi jere nan peyi a? Se dwa nou. Dabò peyi a se pa nou. Epi se kòb nou, nou genyen dwa pou nou mande leta kont. Se vre dwe genyen konfidansyalite sou mwayen bagay yo ape fèt men nou swap konnen. Nou  pape ale pi lwen. Nou pa tèktèt men nou vle konnen li ak ekri. Nou reve konnen manevre òdinatè, kreye anjen atifisyèl ki se bagay nenpòt ti moun ki nan nivo primè nan peyi moun ki ape panse kapab fè. Pa sa sèlman. Nou anvi wè peyi an antoure ak jenn ti gason pòtan nou yo, nèg vanyan ki pape pè defann ak pwoteje teritwa nasyonal la. Nou swete leve drapo Desalin lan byen wo epi Chalmayperalteman di Ayiti pou Ayisyen.



      Ki sa li manke pou nou santi nou fyè paske nou se Ayisyen? Nou genyen tè, genyen moun, genyen konesans. Eleman yo reyini pou fè nou tout bon vre yon nasyon. Pou ki sa san Desalin lan pa kapab koule nan venn chak grenn moun ki genyen lonbrik yo mare ak nasyon nèg ak moun wouy sa? 

Nou se yon gwo pèp. Yon pèp kif è istwa li. Pa sèlman pou li men pou anpil gran peyi.

      Wi pou yon lekòl inivèsèl pou timoun tout klas, tout kouch sosyal kapab pwofite. Viv lame D'ayiti nan yon sosyete ki gran moun tèt li e ki pare pou sove souverennte chak pitit tè a.

      Nou pran pawòl sa yo o serye. Yo montre nou yo soti nan bouch yon moun ki ape panse. Panse e ki konnen kouman yon peyi fonksyone. Nou pape lage. Nou ape swiv chak ti pa gouvènman sa ape fè pou konkretize gwosè pwomsès sa yo. Pep Ayisyen louvri je nou. An nou sere Kòd sitirans ki ape bay moun fòs pou pale mete la. Fwa sa lame a ape kreye. Lekol yo ape fonde. Ti moun yo ape enstwi, nasyon an ape sekirize. Viv pèp Ayisyen nan yon Ayiti ki gran moun tet li.