Sitiyasyon Ayisyen ilegal trè kritik aktwèlman Sen Domeng

      Si memwa nou pa fè nou defo Repiblik Dominiken se pwemye peyi ki te asiste ayiti apre tranbleman ki te pase 12 janvye 2010 la nan manje, sekouris, dlo pou moun bwè, èd medikal elatriye. Nan koperasyon 2 peyi sou gouvènman Preval/Fernandez la Sen Domeng te aksepte ayisyen yo rantre lakay li pou yon tan endefini. Plizyè milye moun te genyen chans benefisye avantay sa. Kòm tan ape pase bagay yo ape chanje kondisyon vi an ape vini pi difisil pou yon Ayisyen. Sonje relasyon 2 sosyete sa yo pa janmen fini twò kòdyòm.

      Nan mitan ane 1010 lan Ayiti frape yon lòt fwa ak yon gwo katastwòf natirèl kote plis ke 5800 moun pèdi vi yo ak maladi kolera a. Sitiyasyon sa pwovoke yon twoub nan zanmitay ayiti ak repiblik dominiken. Depi dega maladi sa li tounen yon libi, yon pretèks moun sa yo kenbe chak fwa yo anvi maltrete ayisyen yo. Depi yo deside rapatriye Ayisyen yo avanse tèz sa. Aktwèlman tout Ayisyen ilegal nan mawon. Yo pa kapab sikile. Menm nan machin prive kou leta yo kanpe pou voye tounen moun ki san papye yo. Nan chak pozisyon ou pase ou jwenn 4 a 5 gad ak zam nan men, manm imigrasyon ki ape veye kote ayisyen ape soti. Yo vyolan epi tretman yo pa imen. Kondisyon ijyèn nan baz kote yo mete moun yo pa reponn ak nòm entènasyonal yo trete moun. Yon tralèt pou 67 dèfwa 80 menm 90 moun nan yon sèl ti chanm. Nan yon sòl si di bò lanmè, marengwen, fredi ou kapab santi ou menm ki ape li nan monan sa ki jan moun sa yo ye anndan selil sa. Si yo rive avan 4 yo bay yo yon ti diri ak aransò mal prepare. Yon dlo ki pa sanble trete ak anyen nan yon botik ki pa trò diferan de sa yo mete fatra yo. Kwè nou si ou vle dayè moun ki ape pote yo a pa pi byen ke sa yo ape ofri a.

      Nou ta dwe poze kesyon pou wè si reyèlman moun sa yo ape mete ayisyen deyè ou byen yo ape fè yon biznis ak yo? Pou chak kagezon moun yo pran anvan yo antre nan baz la 70% deja rete nan wout. A 1500 kèk moun R.D 2000 peso ou kapab wè si machin lan pran 120 moun 30 ou byen 35 sèlman rive regle kantite kòb sa fè. Bèl biznis pa vre? se pa anyen. Kote yo lage ou a genyen tan genyen yon lòt gwoup ki ape rete tann ou sa vle di yon lòt 1500 oubyen 2000 peso ou pwale peye. 2 opsyon, swa ou kache kò ou ou byen mache ak kòb ou.

      Leta ayisyen ta dwe definitivman panche sou ka sa paske li pa reprezante yon bèl imay pou sosyete a nan je moun ki ape obsève nou, epi sa diminye respè nou devan moun sa yo. Yon peyi kote 97 % resous yo depann de nou, si yon jou nou ta deside paralize mache ki mete an evidans fwontyè yo yo tonbe a zewo ki sa gouvènman Ayisyen an panse fè ak ka sa? Nou pa kapab rete ape gade jan bagay sa ape avanse. Se swa nou moun ou byen nou sispann egziste.
      Mwen espere fwa sa dirijan yo ape tande epi pran an chay pwoblèm sa paske li koumnanse twò grav.